Душанбе. 29-уми январ. ОИ «Азия-Плюс» - Имрӯз корҳои таъмири агрегати саввуми нерӯгоҳи Норак шурӯъ шуд.

Тавре сухангӯи ширкати «Барқи тоҷик» Нозир Ёдгорӣ ба ОИ «Азия-Плюс» хабар дод, тибқи нақша корҳои таъмири агрегат ба муддати панҷ моҳ пешбинӣ гардида буданд, вале мутахассисони ширкати русиягии «Бурейс-ГМ», ки масъулияти таъмирро ба дӯш гирифтаанд, таъмири онро ду моҳ пеш аз мӯҳлат ваъда доданд.

Дар мавриди шарҳи масъалаи вазъи обанбори нерӯгоҳи Норак Н.Ёдгорӣ изҳор дошт, ки феълан сатҳи об дар он 863 метру 49 сантиметрро ташкил медиҳад ва то ҳадди ниҳоии иҷозаи истифодаи об 6,5 метр боқӣ мондааст.

Ба гуфтаи манбаъ, айни замон ҳаҷми ҷоришавии об ба обанбор муодили 110 метри мукааб дар як сония аст, хароҷот бошад, ба 487 метри мукааб дар як сония баробар аст.