Душанбе. 30-юми январ. ОИ «Азия-Плюс» - Вазири мелиоратсия ва захираҳои оби Тоҷикистон Саиди Ёқубзод дар ҷамъи рӯзноманигорон изҳор дошт, ки вазорат аз миқдори қарзи зиёди ҷамъшудаи хоҷагиҳои деҳқонӣ изҳори нигаронӣ дорад, зеро имрӯз маблағи ин қарз ба 148 млн. сомонӣ расидааст. «Соли сипаригашта хоҷагиҳо қарзашонро ҳамагӣ ба андозаи 27 дарсад пардохт намуданд, вале мо то ҳанӯз 80-90 дарсади хоҷагиҳоро бо об таъмин месозем», - гуфт ӯ.

            Ба гуфтаи вазир, камбуди маблағ имкон намедиҳад, ки саривақт корҳои омодагӣ ба мавсими нави киштукор анҷом дода шаванд ва ҳамчунин вазорат дар назди ширкати «Барқи тоҷик» аз истифодаи барқ ба маблағи 92 млн. сомонӣ қарздор аст. «Эҳтиёҷи солонаи истифодаи барқ дар бахши мелиоратсия ҳамагӣ 52 млн. сомониро ташкил медиҳад, маблағи боқимонда қарзи солҳои пешин аст», - афзуд С.Ёқубзод.