Душанбе. 6-уми феврал. ОИ «Азия-Плюс» - Айни замон мизони об дар обанбори Норак 861 метру 32 сантиметрро ташкил медиҳад.

Сухангӯи ширкати «Барқи тоҷик» Нозир Ёдгорӣ мегӯяд, сатҳи воридоти об ба обанбори Норак афзуда, феълан ҳудуди 130 метри мукааб дар як сонияро ташкил медиҳад, ки дар муқоиса бо нишондиҳандаи ҳафтаи гузашта 20 метри мукааб зиёдтар аст. «Хароҷоти об аз обанбор 460 метри мукааб дар як сонияро ташкил медиҳад ва ин дар ҳолест, ки барои бо иқтидори пурра фаъолият намудани нерӯгоҳи Норак сатҳи воридоти об ба он бояд ба 480-500 метри мукааб дар як сония баробар бошад», - гуфт ӯ.

Н.Ёдгорӣ изҳор дошт, бо назардошти вазъи мавҷуда ҳаҷми интиқоли барқ ба ширкати алюминии тоҷик боз ба миқдори 200 ҳазор кВт/соат коҳиш ёфта, айни замон он ба 14,8 млн. кВт/соат баробар шуд.

Мувофиқи маълумоти ширкат, айни замон Тоҷикистон ба хориҷи кишвар нерӯи барқ содирот намекунад.

  Дар ҳамин ҳол, дар кишвар лимити истифодаи барқ, ки аз 27-уми январи соли равон ҷорӣ гардид, то ҳанӯз амал мекунад. Ба сокинони пойтахт интиқоли нерӯи барқ аз соати 23-и шаб то 5-и субҳ қатъ карда мешавад.