Душанбе. 6-уми феврал. ОИ «Азия-Плюс» - Мудири Маркази муҳоҷирати вилояти Свердловски Русия иттилои чанде қабл интишоршуда дар чанде аз васоити ахбори оммаро дар бораи ҷалб накардани муҳоҷирони меҳнатӣ дар соли ҷорӣ рад сохт.

Дар мусоҳиба ба хабарнигори ОИ «Азия-Плюс» номбурда изҳор дошт, ки оид ба ҷалб накардани муҳоҷирони меҳнатӣ ба кор дар сои 2009 ҳеҷ супоришоти расмӣ нашудааст. «Гузашта аз ин, соли равон низ тартиби қабул ба кор муқаррарӣ буда, дар чаҳорчӯбаи муайяннамуда ба миқдори 133 ҳазор ҷойи корӣ сурат хоҳад гирифт», - гуфт ӯ.

Тибқи маълумоти Хадамоти федеролии муҳоҷирати вилояти Свердловск, дар ахири моҳи январи соли ҷорӣ 806 нафар шаҳрванди хориҷӣ ба кор қабул ва 522 нафар аз кор озод карда шудаанд. Мувофиқи омори расмӣ, аввали соли ҷорӣ дар қаламрави вилояти Свердловск 17 ҳазору 324 шаҳрванди Тоҷикистон чун муҳоҷирони меҳнатӣ ба қайд гирифта шудаанд.