Душанбе. 10-уми феврал. ОИ «Азия-Плюс» - Вазорати умури дохилии ҷумҳурӣ ояндаи наздик ният дорад дар баъзе минтақаҳои Русия консулҳои фахрии Тоҷикистонро таъин намояд.

Тавре ба ОИ «Азия-Плюс» аз департаменти иттилооти Вазорати умури хориҷии ҷумҳурӣ хабар доданд, чунин пешниҳод ба Вазорати умури хориҷии Русия ирсол гардида, феълан интизори посух мебошанд. «Мо ният дорем, ки ба ҳайси консулони фахрӣ собиқ шаҳрвандони ҷумҳуриро, ки феълан шаҳрванди Русия ҳастанду миёнаи ҷомеаи ин кишвар соҳиби обрӯву нуфуз мебошанд, таъин намоем», - гуфт манбаъ.

Бино ба иттилои манбаъ, шумораи чунин консулон то 20 нафар расида метавонад. «Пешбинӣ мегардад, ки консулони фахрӣ ба ҳалли мушкилоти шаҳрвандони Тоҷикистон, ки муваққатан дар қаламрави Русия будубош доранд, мусоидат намуда, асосан дар минтақаҳои дорои намояндагиҳои дипломатии Тоҷикистон ба фаъолият машғул хоҳанд гашт», - афзуд сарчашма.

Тибқи иттилои сарчашма, барои фаъолияти консулони фахрӣ пардохти музди меҳнат пешбинӣ нагардидааст.