Душанбе. 10-уми феврал. ОИ «Азия-Плюс» - Ҳаҷми қарзи Тоҷикистон дар назди «Узтраснгаз» барои гази ба ҷумҳурӣ интиқолгардида аз оғози сол ба миқдори 7 млн. $ афзуда, феълан 16 млн. доллари амрикоиро ташкил медиҳад.

Тавре аз ҶС «Тоҷиктраснгаз» ба ОИ «Азия-Плюс» хабар доданд, ба иллати афзудани маблағи қарз ҷониби Ӯзбекистон марҳила ба марҳила ҳаҷми интиқоли газро коҳиш дода истодааст. «Агар чанд рӯз қабл ҳаҷми интиқоли гази Ӯзбекистон ба ҷумхурӣ 45 ҳазор метри мукааб дар як соатро ташкил медод, имрӯз он ба 25 ҳазор метри мукааб баробар шудааст», - гуфт манбаъ.

Ба иттилои манбаъ, гази воридгашта миёни аҳолӣ, КВД «Тоҷиксемент», КВД «Талко» ва Маркази барқу гармидиҳии шаҳри Душанбе тақсим карда мешавад. Бинобар камбуди маводи сӯшишворӣ феълан ҶСП «Тоҷиказот» аз фаъолият бозмондааст.

Дар ҳамин ҳол, ба гуфтаи манбаъ, қарзи аҳоливу корхонаҳои ҷумҳурӣ барои истифодаи газ рӯ ба афзоиш ниҳодааст. «Масалан, қарзи ширкати «Барқи тоҷик» 9 млн. $ ва аҳолӣ 2-3 млн. доллари амрикоиро ташкил дода, корхонаҳои КВД «Тоҷиксемент», ҶСП «Тоҷиказот», «Сомонсуғдгаз» ва КВД «Талко» низ дар назди ҶС «Тоҷиктрансгаз» маблағи зиёди қарзӣ доранд», - афзуд сарчашма.