Душанбе. 20-уми феврал. ОИ «Азия-Плюс» - Дар ярмаркаи ҷойҳои кории холии шаҳри Душанбе, ки субҳи имрӯз дар маркази фарҳангии ҷавонони «Ориёно» ифтитоҳ гардид, ба хоҳишмандон беш аз 1000 ҷойи корӣ пешниҳод мегардад.

            Тавре директори биржаи меҳнати назди Кумитаи ҷавонон, варзиш ва сайёҳии назди ҳукумати Тоҷикистон Абдурозиқ Кабудов ба ОИ «Азия-Плюс» хабар дод, чорабинии мазкур бо ташаббуси кумита ва Хадамоти муҳоҷирати Вазорати умури дохилии ҷумҳурӣ сурат гирифт.

            Ба гуфтаи Кабудов, биржаи меҳнати ҷавонон дар ярмарка 911 ҷойи корӣ пешниҳод месозад, ки 370 ҷой барои муҳоҷирони меҳнатӣ дар хориҷи кишвар пешбинӣ гардидааст. «Ҷойҳои корӣ асосан дар ширкатҳои кишоварзии шаҳри Маскав ва вилояти Волгогради Русия мавҷуд аст», - гуфт ӯ.

            Ба иттилои манбаъ, дар ярмарка Хадамоти муҳоҷирати Вазорати умури дохилӣ барои бекорон беш аз 200 ҷойи корӣ дар хориҷи кишвар пешниҳод мекунад.