Душанбе. 25-уми феврал. ОИ «Азия-Плюс» - Масъалаи дар Тоҷикистон барҳам додани реҷабандии истифодаи барқ ҳанӯз маълум нест.

Тавре сухангӯи ширкати «Барқи тоҷик» Нозир Ёдгорӣ дар сӯҳбат бо хабарнигори ОИ «Азия-Плюс» изҳор дошт, реҷабандии истифодаи барқро метавон танҳо дар сурати ба кишвар ворид гаштани барқ аз кишварҳои ҳамсоя ва афзоиши ҳаҷми ҷоришавии об ба обанбори нерӯгоҳи Норак барҳам дод. «Феълан ба ҷумҳурӣ аз кишварҳои ҳамсоя нерӯи барқ ворид намегардад ва мо   танҳо бо имконоту захираҳои худ фаъолият дорем», - гуфт ӯ.

Н.Ёдгорӣ мегӯяд, шабонарӯзи гузашта дар ҷумҳурӣ беш аз 24 млн. кВт/соат нерӯи барқ тавлид гаштааст ва ҳатто агар рӯзҳои наздик масъалаи воридоти барқ ба кишвар аз давлатҳои ҳамсоя роҳи ҳалли худро пайдо намояд ҳам, реҷабандии барқ комилан бекор нахоҳад шуд ва танҳо соати истифодаи он тадриҷан афзуда хоҳад шуд.

Дар мавриди шарҳи вазъ дар обанбори нерӯгоҳи Норак, номбурда гуфт, айни замон сатҳи об дар обанбор ба 858,6 метр баробар буда, то сатҳи ниҳоии иҷозаи истифодаи об каме бештар аз 1,5 метр боқӣ мондаст.

Ба гуфтаи Н.Ёдгорӣ, ду рӯзи ахир ҳаҷми ҷоришавии об ба обанбор 160-165 метри мукааб дар як сонияро ташкил медиҳад ва ин дар ҳолест, ки ҷиҳати фаъолияти мӯътадили нерӯгоҳ ҷоришавии ҳудуди 500 метри мукааби об дар як сония зарур аст. «Мо умедворем, ки бо гарм шудани обуҳаво ҳаҷми ҷоришавии об ба обанбор зиёдтар мегардад», - афзуд сухангӯи ширкат.