Душанбе. 25-уми феврал. ОИ «Азия-Плюс» - Мақомоти раҳбарии ширкати ҳавопаймоии « airBaltic»-и Латвия ояндаи наздик ҷиҳати гуфтушунид оид ба ифтитоҳи хатсайри ҳавоӣ миёни шаҳрҳои Душанбеву Рига ба Душанбе меояд.

Тавре сардори Сарраёсати ҳавонавардии шаҳрвандии Вазорати нақлиёти ҷумҳурӣ Азиз Набиев ба ОИ «Азия-Плюс» хабар дод, зимни гуфтушунид тамоми ҷузъиёти ба роҳ мондани парвози ҳавопаймоҳо бо ин хатсайр мавриди баррасӣ қарор хоҳанд гирифт.

Дар ҳамин ҳол, тибқи иттилои сомонаи Авиапорт.ру, ширкати ҳавопаймоии Латвия аз 1-уми июни соли ҷорӣ парвози ҳавопаймоҳоро бо хатсайри мустақими Рига-Душанбе шурӯъ хоҳад кард. Дар иттилои сомона зикр мегардад, ки парвоз бо ин хатсайр ду маротиба дар як ҳафта - рӯзҳои душанбе ва ҷумъа сурат гирифта, вақти парвоз панҷуним соатро дарбар мегирад.