Душанбе. 25-уми феврал. ОИ «Азия-Плюс» - Чанде қабл дар мулоқоти вазири кишоварзии ҷумҳурӣ Қосим Қосимов бо намояндаи Ташкилоти ғизо ва кишоварзии Созмони Милали Муттаҳид дар Тоҷикистон Насим Ҷовид масоили рушди ҳамкориҳои дуҷониба дар соҳаи кишоварзӣ баррасӣ шуданд.

            Тавре аз Вазорати кишоварзии ҷумҳурӣ ба ОИ «Азия-Плюс» хабар доданд, дар доираи татбиқи лоиҳаи ин ташкилот бо дастгирии Бонки ҷаҳонӣ ба аҳолии камбизоат кӯмак расонида мешавад. Зикр гардид, ки дар чаҳорчӯбаи татбиқи лоиҳа ба аҳолии аз офатҳои табиӣ зарардидаи вилояти Хатлон 1 ҳазору 265 тонна тухмии гандум тақсим карда шуд. Ҳамчунин ба хоҷагиҳо боз 2 ҳазору 100 тонна нуриҳои минералӣ чун кӯмак дода мешавад.

            Намояндаи ташкилоти СММ аз сатҳи ҳамкориҳо изҳори қаноатмандӣ карда, ҷиҳати кӯмаки минбаъда ба бахши кишоварзии кишвар як қатор пешниҳодоти дигар иброз дошт.

            Дар фарҷоми мулоқот вазири кишоварзии ҷумҳурӣ ба намояндаи ташкилоти СММ барои кӯмакҳои расонида изҳори миннатдорӣ намуд.