Душанбе. 3-юми март. ОИ «Азия-Плюс» - Чанде қабл дар ҳузури раиси шаҳри Душанбе Маҳмадсаид Убайдуллоев бо иштироки муовинон, раисони ноҳияҳои пойтахт ва намояндагони мақомоти хифзи ҳукуқи шаҳр машаварати корӣ баргузор шуд.

            Тавре сухангӯи раиси шаҳри Душанбе Шавкат Саидов ба ОИ «Азия-Плюс» хабар дод, дар ҷаласа ба масъалаи истифодаи оқилонаи заминҳои ҷудогардида дар пойтахт таваҷҷӯҳи хосса зоҳир гардид. «Ба сарраёсати ободонии пойтахт ҷиҳати пурзӯр намудани назорат аз болои истифодаи оқилонаи заминҳо новобаста аз шакли моликият супоришоти мушаххас дода шуд», - гуфт ӯ.

            Ба иттилои манбаъ, ҳамчунин раиси шаҳр ба мақомоти дахлдор супориш дод, ки дар сурати муроҷиати корхонаву ташкилот ҷиҳати гирифтани иҷозатнома барои иҷораи замин, ба онҳо мусоидат карда шавад. «Барои назорати фаъолият ва таъмини кори мунтазами нақлиёти ҷамъиятӣ истифодаи имкони ҷомеа ва ВАО мувофиқи мақсад дониста шуд», - афзуд Ш.Саидов.