Душанбе. 7-уми март. ОИ «Азия-Плюс» - Маркази иттилооти СММ бо истинод ба гузориши ҳамасолаи Созмони байнулмилалии меҳнат (СБМ) хабар медиҳад, ки бӯҳрони моливу иқтисодии сартосарӣ ба афзоиши мизони бекорӣ миёни занон боис мегардад.

Ба иттилои манбаъ, мувофиқи гузориши СБМ, соли равон имкон дорад 22 млн. нафар занон дар ҷаҳон аз кори хеш маҳрум шаванд. Гузашта аз ин, коршиносони СБМ пешгӯӣ мекунанд, ки соли 2009 мизони бекорӣ миёни занон ба нишондиҳандаи рекордӣ - 7,4 дарсад (дар байни мардон – 7 дарсад) баробар мешавад ва аз он изҳори нигаронӣ мекунанд, ки нобаробарии даромади мардону занон торафт зиёдтар хоҳад шуд.

Дар ҳамин ҳол, зикр мегардад, ки таъсири тамоили мазкур дар минтақаҳо яксон нахоҳад буд. Тибқи пешгӯии коршиносони СБМ, ин тамоил дар кишварҳои Амрикои Лотинӣ бештар суурат гирифта, асари он дар кишварҳои аз ҷиҳати саноатӣ рушдёфта ва давлатҳои ИДМ камтар эҳсос хоҳад шуд.