Душанбе. 13-уми март. ОИ «Азия-Плюс» - Чанде қабл дар Агентии назорати маводи нашъаовари назди президенти Тоҷикистон мулоқоти роҳбари ин агентӣ Рустам Назаров бо ҳайати САҲА таҳти роҳбарии сармушовири милиса дар назди дабири куллии ин созмон Кевин Карти баргузор шуд.

            Тавре сардори шӯъбаи робита бо ҷомеаи агентӣ Саъдулло Раҳматуллоев ба ОИ «Азия-Плюс» хабар дод, ҷонибҳо сатҳи ҳамкориҳои дуҷонибаро хуб арзёбӣ намуданд. «Рустам Назаров аз дастгирии САҲА дар татбиқи як қатор лоиҳаҳои мубориза бо муомилоти ғайриқонунии маводи мухаддир ба намояндаи созмон изҳори миннатдорӣ карда, ҳамчунин меҳмононро бо фаъолияти агентӣ ва вазъи мубориза бо маводи мухаддир дар Тоҷикистон ва минтақа ошно сохт», - гуфт ӯ.

            Ба гуфтаи С.Раҳматуллоев, дар вохӯрӣ ҷонибҳо ҳамчунин масъалаи дар заминаи агентӣ барои кормандони мақомоти мубориза бо маводи нашъаовари Афғонистон ташкил намудани курсҳои бозомӯзиро низ мавриди баррасӣ қарор доданд.