Душанбе. 17-уми март. ОИ «Азия-Плюс» - Дар мусоҳиба ба «Садои Амрико» сарвари иҷроияи ташаббуси Вулфенсон дар назди Донишкадаи Брукингс, собиқ ноиби президенти Бонки ҷаҳонӣ Йоханесс Линн изҳор доштааст, ки дар минтақаи Осиёи Марказӣ Тоҷикистону Қирғизистон осебпазиртарин кишварҳо дар қиболи бӯҳрони молӣ мебошанд.

            Ба гуфтаи ӯ,   ба ин кишварҳо бӯҳрони энергетикиву обӣ асари шадид гузошта, баргаштани муҳоҷирони меҳнатӣ ва бо ҷойи кор таъмин сохтани онҳо мушкили дигар зам месозад.

            Номбурда таъкид сохтааст, ки бар асари бӯҳрони энергетикӣ дар кишварҳои фавқуззикр ҳанӯз як сол пештар аз бӯҳрони ҷаҳонии молӣ чунин вазъ ба амал омада буд ва аз ҷониби ҳкумати кишвар чораҳо андешида шуда, ҳамчунин созмонҳои байнулмилалӣ низ бо маҳсулоту маводи гуногун ба ин кишварҳо кӯмак расониданд, вале маълум гардид, ки он нокофӣ аст. «Аз ин рӯ, Хазинаи байнулмилаии асъор, Бонки рушди Осиё ва Бонки ҷаҳонӣ дар ҳамдастӣ бо ҳукумати давлатҳо ба татбиқи барномаҳои зиддибӯҳронӣ шурӯъ намуданд», - гуфтааст вай.

            Йоханесс Линн аз он изҳори нигаронӣ намудааст, ки чораҳои зиддибӯҳронии феълан пешгирифта кофӣ нестанд ва «зарур аст, иқдомоти бештареро анҷом дод, зеро бӯҳрони молии ҷаҳонӣ акнун оғоз гардидааст ва оқибатҳои ногувори он барои баъе кишварҳо метавонанд фоҷиабор бошанд».