Душанбе. 13-уми май. ОИ «Азия-Плюс» - Раиси шаҳри Душанбе Маҳмадсаид Убайдуллоев оид ба ташкили истироҳати тобистонаи кӯдакон ва наврасон қарор ба имзо расонид.

Чӣ тавре ки сухангӯи раиси пойтахт Шавкат Саидов ба ОИ «Азия-Плюс» хабар дод, мутобиқи қарори мазкур, истироҳати тобистонаи кӯдакону наврасони пойтахт дар истироҳатгоҳҳои берназшаҳрии дараҳои Варзобу Ромит ва инчунин дар истироҳатгоҳҳои солимиву варзишии назди мактабҳои таҳсилоти умумӣ ташкил карда мешавад. «Ташкили истироҳату фароғати 1600 кӯдакону наврасон дар истироҳатгоҳҳои беруназшаҳрӣ ва ҳудуди 3 ҳазору 600 нафар дар истироҳатгоҳҳои назди макотиб ба нақша гирифта шудааст», - гуфт ӯ.

Ба гуфтаи сухангӯи раиси пойтахт, М.Убайдуллоев дар ин робита ба мақомоти дахлдор супориш додааст, ки истироҳати тарбиятгирандагони инетрнату хонаҳои кӯдакон ва фарзандони оилаҳои камбизоат аз ҳисоби буҷаи шаҳр таъмин гардад.