Душанбе. 26-уми май. ОИ «Азия-Плюс» - Дар чаҳорчӯбаи баргузории амалиёти «Кӯкнор-2009» сарбозони нерӯҳои марзбонии КДАМ дар ҳамдастӣ бо кормандони АНМН рӯзи 23-юми май дар мавзеи Зиғар Валвалаки ноҳияи Дарвоз амалиёти вижа доир сохтанд.

Чӣ тавре ки ба ОИ «Азия-Плюс» аз Сарраёсати нерӯҳои марзбонии Кумитаи давлатии амнияти миллӣ иттилоъ доданд, пас аз задухӯрди мусаллаҳона дар ин мавзеъ гурӯҳи қочоқбарон ба Афғонистон паноҳ бурда, дар маҳали ҳодиса 20 кило маводи мухаддир дарёфт гардид. «Ғайр аз ин, рӯзи 25-уми май дар натиҷаи баргузории амалиёти навбатӣ дар мавзеи Паткмоу-Сари Оби ҳамин ноҳия 10 нафар узви гурӯҳи қочоқбар боздошт шуда, аз онҳо ба миқдори умумии ҳудуди 65 кило маводи мухаддир мусодира карда шуд», - гуфт манбаъ.

Тибқи малумоти манбаъ, ин гурӯҳ ба интиқоли маводи мухаддир аз Афғонистон ба Тоҷикистон ва сипас ба кишварҳои узви ИДМ машғул будааст.