Душанбе. 26-уми май. ОИ «Азия-Плюс» - Имрӯзҳо кишоварзони ҷумҳурӣ бо ҷидди ҷаҳд ба киштукори такрории чигит дар заминҳои осебдида камар бастаанд.

Чӣ тавре ки ба ОИ «Азия-Плюс» сардори шӯъбаи зироатҳои ғалладонаи раёсати рустанипарварии Вазорати кишоварзии ҶТ Муҳаммадӣ Ормонов иттилоъ дод, то имрӯз аз 22 ҳазору 401 гектар заминҳои пахтаи зарардида, дар 21 ҳазору 552 гектараш кишти такрории чигит анҷом дода шудааст, вале то ҳанӯз миқдори дақиқи заминҳои зарардида муайян нест.

Ба гуфтаи М.Ормонов, то ба имрӯз дар кишвар маъракаи киштукори чигит ба андозаи 88 дарсад ба иҷро расида, бар асари обуҳавои номусоид деҳқонон аз нишондиҳандаи ҳамин давраи соли гузашта дар 92 ҳазор гектар камтар чигит кишт кардаанд. «Дар баъзе ноҳияҳо пунбадона ба нашъунамо шурӯъ кард ва дар 137,5 ҳазор гектар баргузории корҳои агротехникӣ оғоз гардиданд», - афзуд ӯ.