Душанбе. 27-уми май. ОИ «Азия-Плюс» - Имрӯз дар шаҳри Душанбе Омӯзишгоҳи олии Созмони амният ва ҳамкории Аврупо оид ба идораи марзҳо ифтитоҳ гардид.

Дар омӯзишгоҳ ҳайати фармондеҳии нерӯҳои марзбонии кишварҳои узви САҲА ва ҳамчунин кишвари ҳамсояи Афғонистон таҳсил карда, дар он ба роҳандозии барномаи таҳкими ҳамкории байниидоравӣ ва фаромарзӣ дар минтақа таваҷҷӯҳи хос зоҳир хоҳад шуд.

Дар маросими ифтитоҳи омӯзишгоҳ вазири корҳои хориҷии ҶТ Ҳамрохон Зарифӣ изҳор дошт, ки барои таъсис ва фаъолияти муассисаи таълимӣ кишварҳои узви САҲА дар муддати 7 сол 5 млн. Евро маблағ ҷудо месозанд, ки 2,3 млн. Еврои он соли аввали фаъолияти омӯзишгоҳ ихтисос дода мешавад.

Зикр гардид, ки давомнокии курсҳои омӯзишӣ дар ин омӯзишгоҳ 2 моҳ буда, дар муддати як сол чаҳор маротиба доир мегарданд. Дар ин ҷо ба шунавандагони курсҳо оид ба масоили мубориза бо терроризм, ҷинояткории муташаккили фаромиллӣ, муҳоҷирати ғайриқонунӣ, гардиши ғайриқонунии маводи мухаддир, аслиҳаи ҳастаӣ, биологӣ, кимиёвӣ, силоҳи оддии оташфишон, харидуфурӯши одамон ва ғайра маълумоти муфассал пешниҳод хоҳад шуд.