Душанбе. 27-уми май. ОИ «Азия-Плюс» - Ҳафтаи ахир дар шаҳри Душанбе арзиши бензин ба андозаи 30 дарсад боло рафт. Агар аввали ҳафтаи гузашта нархи бензини нави АИ-92 ба 2,30 сомонӣ баробар буд, имрӯз арзши он ба 3 сомонӣ расидааст. Мутаносибан арзиши навъҳои дигари он низ зиёд шуд.

            Намояндагони Вазорати рушди иқтисод ва савдои ҶТ болоравии нархи бензинро ба афзоиши қурби асъор дар кишварҳои таъминкунандаи Тоҷикистон бо маводи сӯзишворӣ ва оғози мавсими киштукор дар ин кишварҳо марбут медонанд.

            Бино ба маълумоти Вазорати энергетика ва саноати ҶТ, феълан 80 дарсади воридоти маводи сӯзишворӣ ба Тоҷикистонро ҶДММ «Газпромнефт – Тоҷикистон», ҶДММ «Тоҷирон» ва «Умед» таъмин месозанд. Маҳсулоти нафтӣ асосан аз Русия (ҳудуди 70 дарсад), Қазоқистон, Ӯзбекистон ва Туркманистон ба ҷумҳурӣ ворид мегардад.