Душанбе. 13-уми июн. ОИ «Азия-Плюс» - Мудири иҷроияи Хазинаи байнулмилалии асъор Доминик Стросс-Кан нахустин сафари худро ба минтақаи Осиёи Марказӣ шурӯъ намуда, рӯзҳои 15-18-уми июн аз Қазоқистон, Тоҷикистон, Қирғизистон ва Ӯзбекистон боздид мекунад.

            Дар иттилоияи ХБА гуфта мешавад, зимни сафар мудири иҷроияи ХБА бо намояндагони ҳукуматҳои кишварҳои минтақа, вакилони парлумон, намояндагони ҷомеаи шаҳрвандӣ ва доираҳои академӣ дидору гуфтушунид хоҳад кард. « Дар ҷараёни дидору гуфтушунид ба тарзҳои муассири расонидани кӯмак ба кишварҳои минтақа бинобар бӯҳрони молӣ аз ҷониби ҷомеаи ҷаҳонӣ, аз ҷумла, ХБА таваҷҷӯҳи хос зоҳир хоҳад шуд», - омадааст дар иттилоия.

            Ёдрас мекунем, ки ахири моҳи апрели соли ҷорӣ Шӯрои мудирони ХБА барномаи нави сесолаи қарзӣ барои Тоҷикистон дар ҳаҷми 116 млн. доллари ИМА-ро тасдиқ кард.