Душанбе. 16-уми июн. ОИ «Азия-Плюс» - Мӯҳлати мавриди истифода қарор гирифтани марҳилаи аввали сохтмони роҳи мошингарди Душанбе-Хуҷанд-Чаноқ аз моҳи июн то ахири моҳи августи соли ҷорӣ тамдид шуд.

            Чӣ тавре ки ба ОИ «Азия-Плюс» муовини мудири иҷроияи Маркази татбиқи лоиҳаи роҳи мошингарди Душанбе-Хуҷанд-Чаноқ Рустам Абдуллоев иттилоъ дод, тамдиди мӯҳлати истифодаи роҳ пеш аз ҳама, ба бӯҳрони молӣ ва боришоти зиёду резиши лойқа ва гилоб дар қитъаҳои роҳ вобаста аст. «Айни замон корҳои таъмиру тармим дар 233 километри роҳ ба анҷом расида, 183 километри он дар вилояти Суғд ва 50 километр дар ноҳияи Варзоб воқеъ аст», - гуфт ӯ.

            Ба гуфтаи номбурда, то анҷоми пурраи корҳо дар марҳилаи аввали сохтмон таъмири 102 километри роҳ боқӣ мондааст. «Анҷоми марҳилаи дуввум ва саввуми сохтмони роҳи мазкур моҳи июли соли 2010 ба нақша гирифта шуда, мавриди истифодаи пурра қарор гирифтани роҳи мошингарди Душанбе-Хуҷанд-Чаноқ моҳи сентябри соли 2011 пешбинӣ шудааст, - афзуд Р.Абдуллоев.