Душанбе. 18-уми июн. ОИ «Азия-Плюс» - Тоҷикистон дар чаҳорчӯбаи лоиҳаи ТРАСЕКА оид ба рушди нақлиёти мултимодалӣ созишнома ба имзо расонид.

            Чӣ тавре ки ба ОИ «Азия-Плюс» аз Вазорати нақлиёт ва коммуникатсияи ҶТ иттилоъ доданд, аз ҷониби Тоҷикистон созишномаро муовини вазири нақлиёт ва коммуникатсияи ҷумҳурӣ Ҷумъахон Зуҳуров ба имзо расонид. Номбурда дар Иссиқкӯли Қирғизистон рӯзҳои 15-16-уми июни соли ҷорӣ дар кори ҷаласаи солонаи комиссияи байниҳукуматии ТРАСЕКА ширкат варзид.

            Бино ба иттилои манбаъ, дар созишнома танзими муносибот миёни муассисаҳои нақлиётӣ, операторони нақлиётии мултимодалӣ, таъминкунандагон ва қабулкунандагони бору маҳсулот ва дигар шахсони воқеиву ҳуқуқӣ, ки хизмтрасонии мултимодалиро анҷом дода, аз номи соҳиби бор амал мекунанд, дарҷ ёфтааст. «Дар санади мазкур ҳамчунин ҳуқуқ, ӯҳдадорӣ ва масъулияти ҳар як иштирокчии раванди ҳамлу нақли бор муайян карда шудааст», - афзуд манбаъ.