Душанбе. 19-уми июн. ОИ «Азия-Плюс» - Иттиҳоди иқтисодии Авруосиё (ЕврАзЭС) ва Иттиҳоди Аврупо оид ба дар ояндаи наздик ба имзо расидани Меморандум дар бораи ҳамкории мутақобила, аз ҷумла, дар бахши иқтисодӣ ба мувофиқа расиданд. Дар ин хусус зимни нишасти хабарии аз ҷониби хабаргузории РИА Новости ташкилгардида дабири кулли ЕврАзЭС Тоҳир Мансуров хабар додааст.

            Тибқи иттилои хабаргузории Русия,Т.Мансуров изҳор доштааст, ки иттиҳод қотеъона баҳри ноил гаштан ба таъсиси намунаи сохтори Иттиҳоди Аврупо дар Шарқ наздик мегардад. «Таъсиси Иттиҳоди гумрукии Русияву Белорус

ва Қазоқистон, ки аз 1-уми январи соли 2010 ба фаъолият оғоз мекунад, иқдоми муассир дар ин самт аст», - гуфтааст ӯ.

            Дабири кулли иттиҳод инчунин гуфтааст, кишварҳои узви иттиҳод – Русия, Белорус, Қазоқистон, Қирғизистон ва Тоҷикистон роҳу воситаҳои раҳоӣ аз бӯҳрони молиро бо кишварҳои нозири иттиҳод – Арманистон, Молдова ва Украина мувофиқа месозанд. «Омилҳои зикршуда ба ташакккули бозори умумии минбаъд миқёсан баробар бо бозори умумии Иттиҳоди Аврупо мусоидат менамоянд», - баён доштааст ӯ.

            Номбурда афзудааст, марҳилаҳои ҳамгиройии кишварҳои ЕврАзЭС таҷассумгари равандҳое мебошанд, ки дар давраҳои таъсиси Иттиҳоди Аврупо сурат гирифта буданд, вале агар дар ИА ин раванд тӯли даҳсолаҳо ба вуқӯъ пайваста бошад, дар Иттиҳоди иқтисодии Авруосиё он шурӯъ аз соли 2000 босуръат амалӣ мегардад.