Душанбе. 4-уми июл. ОИ «Азия-Плюс» - Бар асари таркиши мина дар марзи Ӯзбекистону Тоҷикистон боз як шаҳрванди кишвар ба ҳалокат расид.

            Чӣ тавре ки ба ОИ «Азия-Плюс» аз мақомоти ҳифзи ҳуқуқи ҷумҳурӣ иттилоъ доданд, ҳодиса шоми рӯзи 2-юми июл дар наздикии кӯҳи Муллосойи ҷамоати Фароби ноҳияи Панҷакент рух додааст.

            Бино ба иттилои манбаъ, сокини маҳаллӣ - Мӯҳсин Мирзоеви 33-сола ҳангоми чаронидани чорво ба мина бархӯрда, аз таркиши он ба ҳалокат мерасад.

            Қобили зикр аст, ки дар қаламрави Тоҷикистон минаҳо солҳои ҷанги шаҳрвандӣ дар шарқи кишвар ва дар марз бо Ӯзбекистон гузошта шуда буданд. Ҷониби Ӯзбекистон мингузориро дар сарҳад ҳамчун пешгирии воридшавии ҷанговарони тоҷик ба қаламрави кишвараш маънидод карда буд.