Хоруғ/Душанбе. 11-уми июл. ОИ «Азия-Плюс» - Рӯйдодҳои ахир дар вилояти Синтзян-Ӯйғури Чин ба фаъолияти гузаргоҳи назоратии «Қулма» дар марзи Тоҷикистону Чин бевосита таъсир накардааст.

            Чӣ тавре ки ба ОИ «Азия-Плюс» муовини аввали сардори раёсати хадамоти гумрук дар ВМКБ Ёрмаҳмад Фақиров иттилоъ дод, айни замон гуузаргоҳи «Қулма» тибқи реҷаи муқаррарӣ фаъолият дорад, вале ҳаҷми ҳамлу нақли молу маҳсулот коҳиш ёфтааст. «Агар ҳафтаи гузашта посгоҳро то 10-15 мошин убур мекард, ҳафтаи ахир шумори онҳо на зиёдтар аз 1-2 ададро ташкил медиҳад», - гуфт ӯ.

            Номбурда афзуд, ҷиҳати тағйир додани реҷаи кори гузаргоҳ ҳеҷ амру фармоне нарасида, ҳамаи хадамот мувофиқи тартиби муайяншуда кор мекунанд.

            Дар ҳамин ҳол, роҳбари шӯъбаи тарҷума ва робита бо ҷомеаву ВАО-и КВДҲ «Тоҷик Эйр» Назира Давлтова ба ОИ «Азия-Плюс» изҳор дошт, ки парвози ҳавопаймоҳо ба шаҳри Урумчӣ мунтазам сурат гирифта, он тибқи реҷа, ҳар ҳафта рӯзҳои душанбе ва панҷшанбе анҷом дода мешавад.

            Тибқи маълумоти департаменти иттилооти ВКХ ҶТ, оид ба муваққатан манъ кардани сафари шаҳрвандони Тоҷикистон ба Чин ҳеҷ нота паҳн нашудааст.