Душанбе. 17-уми июл. ОИ «Азия-Плюс» - Тоҷикистону Ӯзбакистон комиссияи муштараки омӯзиши таъсири партовҳои корхонаҳои саноатӣ ба вазъи экологии ноҳияҳои наздисарҳадии кишварҳоро таъсис медиҳанд.

Ба гуфтаи сардори шӯъбаи назорати истифода ва ҳифзи атмосфераи Кумиати ҳифзи муҳити зисти назди ҳукумати ҶТ Шамс Назаров, айни замон корҳои омодагӣ ба таъсиси комиссия аз ду ҷониб идома дошта, Тоҷикистон аъзои комиссияро таъин намуда, рӯйхати онро ҷиҳати баррасӣ ва тасдиқ ба ҳукумат пешниҳод кардааст.

Дар мавриди таъсири партовҳои корхонаи алюминии Тоҷикистон «Талко» ба вазъи экологии ноҳияҳои наздики он, номбурда гуфт, аз ҷониби мутахассисони кумита бо ҳамроҳии намояндагони озмоишгоҳи маркази назорати таҳлилӣ оид ба таъсири партовҳои заҳрноки корхонаи «Талко» мониторинг гузронида шуда, муайян карда шудааст, ки дар маҳаллаҳои аҳолинишнин дар масоҳати 10 километр аз корхона ҳеҷ таъсироти манфии он ба вазъи экологӣ ба мушоҳида нарасидааст.

Ш.Назаров афзуд, ҳаҷми умумии партовҳои корхонаҳои саноатии Тоҷикистон дар як сол ҳудуди 200 ҳазор тоннаро ташкил медиҳанд ва ин дар ҳолест, ки миқдори партовҳои ҳамасолаи Ӯзбекистон ба 2,5 млн. тонна баробар аст.