Душанбе. 24-уми июл. ОИ «Азия-Плюс» - Бо мақсади иҷрои фармони президенти Тоҷикистон «Дар бораи чораҳои иловагии истифодаи сарфаноки нерӯи барқ» ва таъмини зиёда аз 240 ҳазор оилаҳои камбизоати ҷумҳурӣ бо чароғҳои камммасрафи барқӣ, миёни Вазорати меҳнат ва ҳифзи иҷтимоии аҳолии ҶТ ва ширкати « Ange Lighting »-и Чин бобати аз ҷониби ин ширкат ворид сохтани ҳудуди 2 млн. дона чароғҳои каммасрафи барқӣ ба ҷумҳурӣ созишнома ба имзо расид.  

            Зимни нишасти матбуотӣ вазири меҳнат ва ҳифзи иҷтимоии аҳолии ҶТ Шукурҷон Зуҳуров изҳор дошт, ки чор вагон бо чароғакҳои каммасрафи ин ширкати чиноӣ ба Тоҷикистон фиристода шуда, ояндаи наздик он миёни оилаҳои камбизоат тақсим мегардад. «Аҳолӣ пеш аз мӯҳлати муайяншудаи 1-уми октябр бо чароғҳои каммасраф таъмин гардида, ба ҳар як оила на камтар аз 8 чароғи каммасрафи барқӣ дода мешавад», - таъкид сохт вазир.