Душанбе. 28-уми июл. ОИ «Азия-Плюс» - Вазорати маорифи ҶТ эълом дошт, ки қабули довталабон ба Донишкадаи технологияи инноватсионӣ ва коммуникатсиияи Тоҷикистон муваққатан қатъ карда мешавад.

Чӣ тавре ки ба ОИ «Азия-Плюс» сухангӯи Вазорати маорифи ҶТ Ноилшо Нуралиев иттилоъ дод, дар робита ба ин масъала вазорат аз ҳамаи довталабоне, ки ҳуҷҷатҳои худро ба ин донишкада супорида буданд, хоҳиш мекунад, ки ҳуҷҷатҳои худро бозпас гирифта, то 31-уми июл ба дигар муассисаи таълимӣ супоранд.

Дар Вазорати маорифи ҶТ мегӯянд, фаъолияти донишкадаи мазкур ба

муқаррароти асноди меъёриву ҳуқуқии амалкунанда дар ҷумҳурӣ мутобиқ нест. «Худи донишкада фаъолияташро қатъ намсеозад ва донишҷӯёне, ки дар он таҳсил мекарданд, ба таҳсили худ идома хоҳанд дод», - афзуд Н.Нуралиев.

            Донишкадаи технологияи инноватсионӣ ва коммуникатсияи Тоҷикистон соли 2003 ҳамчун Донишгоҳи байнулмилалии Тоҷикистон таъсис ёфта буд. Баъдтар, соли 2006 он ба Донишгоҳи гуманитарӣ табдили ном кард. Моҳи апрели соли 2007 он Донишкадаи технологияи инноватсионӣ ва коммуникатсияи Тоҷикистон номгузорӣ шуд. Айни замон дар ин муассисаи таълимӣ зиёда аз 1 ҳазору 700 нафар донишҷӯён таҳсил мекунанд. Соли гузашта ба донишкада 543 нафар донишҷӯ қабул карда шуд. Арзиши солонаи шартномаи таҳсил дар донишкада ба 500 доллари ИМА баробар аст. Айни замон дар донишкада 7 факулта – информатика, иқтисоди ҷаҳонӣ, менеҷмент, низомҳои иттилоотӣ ва технология, муносиботи байнулмилалӣ, таъмини лингвистии коммуникатсияҳои байнифарҳангӣ ва ҳуқуқи байнулмилалӣ амал мекунанд.