Душанбе. 30-юми июл. ОИ «Азия-Плюс» - Бо ташаббуси Бонки ҷаҳонӣ намояндагони баландпояи мақомоти бахши энергетика ва мутахассисони бахши фаннии Тоҷикистон баҳри табодули таҷриба ва шиносоӣ бо лоиҳаи бузургтарини гидроэнергеткии давлати Лаос таҳти унвони «Нам Теун 2» аз ин кишвар боздид карданд.

            Чӣ тавре ки ба ОИ «Азия-Плюс» аз намояндагии Бонки ҷаҳонӣ дар ҶТ иттилоъ доданд, табодули таҷриба ва шиносоӣ дар доираи баррасии масоили иродаи сиёсии омода сохтани кишвар ба амалисозии лоиҳаи бузург чун «Нам Теун 2» ва дарки асосҳои фундаменталии табдили лоиҳа барои ноил гардидан ба рушди устувор сурат гирифтааст. «Намояндагони Тоҷикистон аз майдони татбиқи лоиҳаи мазкур, ки қариб 1 млн. гектарро ташкил медиҳад, боздид намуда, бо вазъу ҳолати воқеии он аз наздик ошно гардиданд», - гуфт манбаъ.

            Лоиҳаи бузургтарини давлати Лаос дар соҳаи рушд ба маблағи 1,5 млрд. $ лоиҳаи гидроэнергетикиест дар Лаоси Марказӣ бо иқтидори 1070 мегаватт. Дар давраи консессионии 25-сола татбиқи лоиҳаи мазкур имкон медиҳад, ки дар ҳаҷми 2 млрд. $ даромад ба даст оварда шавад ва ин маблағро ҳукумати Лаос баҳри татбиқи лоиҳаҳои коҳиши сатҳи камбизоатӣ ва ҳифзи муҳити зист истифода хоҳад кард.