Дар Комиссияи марказии интихобот ва раъйпурсии Тоҷикистон изҳор мекунанд, ки муҳлати ҷамъоварии имзоҳо ба ҷонибдорри номзадҳо ба мансаби президентиро дароз карда метавонанд.

Роҳбари Дастгоҳи КМИР Абдуманнон Додоев ба ОИ «Азия-Плюс» дар ин робита изҳор намуд, ки чанде қабл Ҳизби демократ ва Ҳизби коммунисти Тоҷикистон ба КМИР бо чунин дархост муроҷиат кардаанд.

Ба гуфтаи ӯ, дархост бо он асоснок шудааст, ки муҳлати ҷудошуда (то 7-уми октябр) барои фарогирии тамоми манотиқи кишвар аз ҷониби гурӯҳи ташаббускори ҷамъоварии имзоҳо кофӣ нест.

«КМИР дар фурсати наздиктарин муроҷиатро мавриди омӯзишу баррасӣ қарор дода, қонеъ гардидани онро аз эҳтимол дур намедонам», - таъкид дошт Додоев.