Федератсияи иттифоқҳои касабаи мустақили Тоҷикистон ба ҷонибдории номзади пешбарикардаи худ – Эмомалӣ Раҳмон то соати 17:00-и рӯзи 2-юми октябр беш аз 77 ҳазор имзои интихобкунандагонро ҷамъоварӣ намуданд. Дар ин бора ба ОИ «Азия-Плюс» раиси Федератсияи иттифоқҳои касабаи мустақили Тоҷикистон Муродалӣ Солеҳов хабар дод.

Тавре иттилоъ дода шуд, рӯзи 24-уми сентябр дар анҷумани пешазинтихоботӣ Федератсияи иттифоқҳои касабаи мустақили Тоҷикистон ба сифати номзад ба мансаби президентӣ сарвари кунунии давлат Эмомалӣ Раҳмонро пешбарӣ кард. Ба ҷонибдории Эмомалӣ Раҳмон ҳамаи 246 нафар вакилони анҷуман раъй доданд.

Қобили зикр аст, ки Иттифоқҳои касабаи Тоҷикистон соли 1926 таъсис дода шуд. Федератсияи иттифоқҳои касабаи мустақили Тоҷикистон соли 1991 ҳамчун вориси Шӯрои иттифоқҳои касабаи Ҷумҳурии Тоҷикистон таъсис ёфт. Айни замон Федератсияи иттифоқҳои касабаи мустақили Тоҷикистон дар сафҳои худ беш аз 2 млн. 100 ҳазор нафар шаҳрвандони Тоҷикистонро муттаҳид месозад.