Имрӯз Президенти Ҷумҳурии Тоҷикистон Эмомалӣ Раҳмон зимни ироаи паёми солонаи худ ба Парлумони кишвар аз масъулини давлатӣ талаб намуд, ки дар соҳаи молия ва бонкдорӣ бештар занҳоро ба кор қабул намоянд. Зеро кор дар ин соҳа ба занҳо мувофиқтар аст.

Эмомалӣ Раҳмон аз масъулини давлатӣ дар соҳаи молия ва бонкдории кишвар талаб намуд, ки бо ҳисоботҳои хушку холӣ назарфиребӣ накунанд ва супоришҳоро воқеан иҷро намоянд.

Тибқи маълумоти оморие, ки Сарвари давлат зикр намуд, шумораи заноне, ки дар соҳаи маориф ва тандурустӣ фаъолият менамоянд сол аз сол зиёд шуда, имрӯз наздики 70 дарсадро ташкил менамояд.

Соли 2018 дар мансабҳои роҳбарикунанда 19 фоиз ва дар ҳайати хизматчиёни давлатии мақомоти марказӣ ва сохторҳои тобеи онҳо 25 фоизро занону духтарон ташкил додаанд.

Ҳамзамон Эмомалӣ Раҳмон занони кишварро ба поку беолоиш нигоҳ доштани забони тоҷикӣ даъват карда, таъкид намуд, ки ба наслҳои оянда одоби муошират ва суханвариро бо ин забони ширину шоирона омӯзонанд.