Дар Чемпионати ҷаҳон оид ба бокс миёни бонувон 2 варзишгари тоҷик бар рақибони худ пирӯз шуданд.

Бино ба иттилои хадамоти матбуоти Кумитаи миллии олимпии Тоҷикистон, Миҷгона Самадова дар вазни 57 кг намояндаи Кот д-Ивуар Марселат Сакобиро мағлуб карда, ба даври ҳаштякфиналӣ роҳ ёфт. Ӯ дар 1/8-финал бо варзишгари Бритониё Каррис Артингсталл қувваозмоӣ мекунад.

Варзишгари дигари тоҷик Нилуфар Бобоёрова дар вазни 64 кг бар намояндаи Алҷазоир Чаҳира Селмоунӣ дастболо шуда, ба даври чорякфиналӣ баромад. Ӯ рӯзи 10-уми октябр бар муқобили варзишгари рус Екатерина Динник ба ринг мебарояд.

Ду муштзанбонуи дигари тоҷик – Идимоҳ Холова аз варзишгари Ӯзбекистон Шаҳноза Юнусова ва Шоира Зулқайнарова аз варзишгари Венесуэлла Омайлин Алкала мағлуб шуданд.

Ёдовар мешавем, ки аз 3 то 13-уми октябр дар шаҳри Улан-Удеи Русия Чемпионати ҷаҳон оид ба бокс миёни бонувон ҷараён дорад. Дар ин мусобиқа беш аз 300 варзишгари 75 давлат ширкат доранд.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.