Футболбозони тоҷик дар 2 бозии аввали марҳилаи интихобӣ бар ҳарифон пирӯз шуда, аз тими Ӯзбекистон шикаст хӯрданд.

Тими футзали кишвар бо роҳбарии сармураббӣ Деян Дедович дар марҳилаи интихобии Чемпионати Осиё-2020, ки дар Урмияи Эрон баргузор шуд, дар гурӯҳи “А”-и минтақаи Марказӣ/Ҷанубӣ се бозӣ баргузор карда, дар ду бозӣ бар тимҳои Непал (6:0), Афғонистон (5:2) ғалаба кард. Вале аз тими футзали Ӯзбекистон (3:9) шикаст хурд.

Ба иттилои Кумитаи миллии олимпӣ, дар гурӯҳи “А”-и минтақаи Марказӣ/Ҷанубӣ Ӯзбекистон бо се пирӯзӣ ҷойи аввал, Тоҷикистон бо ду ғалаба ва як бохт ҷойи дуюмро ишғол карда, ба марҳилаи финалии Чемпионати Осиё-2020 роҳ ёфтанд. Аз гурӯҳи “В” дастаҳои Эрон, Қирғизистон ва Туркманистон (мизбон) ҳаққи иштирок дар марҳилаи финалиро пайдо карданд.

Дар минтақаҳои дигар низ бозиҳои интихобӣ баргузор шуда, ҳамаи 16 дастаи иштирокчии марҳилаи финалӣ муайян шуданд. Ин дастаҳои Туркманистон (мизбон), Лубнон, Кувайт, Арабистони Саудӣ, Баҳрайн, Уммон, Ҷопон, Чин, Тоҷикистон, Ӯзбекистон, Эрон, Қирғизистон, Тайланд, Индонезия, Кореяи Ҷанубӣ ва  Ветнам мебошанд.

Дастаи мунтахаби Тоҷикистон оид ба футболи толорӣ, ки ба марҳилаи финалии Чемпионати Осиё роҳхат гирифт, рӯзи 27-уми октябр аз Эрон ба Ватан баргашт.

Ёдрас мешавем, ки марҳилаи финалии Чемпионати Осиё оид ба футзал аз 27-уми феврал то 8-уми марти соли оянда дар шаҳри Ашқободи Туркманистон баргузор мешавад.

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.