Хонандагони муассисаҳои таҳсилоти миёнаи шаҳри Хоруғи ВМКБ дар озмуни байнулмилалии “Арифметикаи зеҳнӣ – 2019” дар Гурҷистон пирӯз гардиданд.

“Тоҷикистонро дар ин олимпиада 7 нафар хонандагони мактабҳои Бадахшон муаррифӣ карда, ҳамаи онҳо ҷойҳои намоёнро соҳиб шуданд”, - гуфт ба Asia-Plus корманди Раёсати маорифи ВМКБ Панҷшанбе Назаршоев.  

Аз байни онҳо Зуҳро Алифбекова, хонандаи мактаби №7-и шаҳри Хоруғ сазовори унвони Қаҳрамони мутлақ (Суперчемпион) гардида, ҳамчунин Аниса Имомбердиева, толибилми синфи 7-и литсеи Оғохон ва Шоҳғиёс Маҳмадризохонов, хонандаи синфи 6-и мактаби президентӣ унвони Қаҳрамон (Чемпион)-ро ба даст оварданд.

Ҷойи аввалро муҳассилини литсеи Оғохон – Хайрилобек Абдуламиров (синфи 6) ва Зуҳро Элназарова (синфи 4) соҳиб шуданд.

Доварони озмун ба Абдулназар Мавлоназаров, хонандаи синфи 4-и мактаби президентии шаҳри Хоруғ мақоми дуюм ва Зуҳро Шафиева, хонандаи синфи 7-и мактаби №2 ҷойи сеюмро лоиқ донистанд.

Ин толибилмонро имрӯз, 27-уми ноябр дар фурудгоҳи шаҳри Душанбе пешвоз гирифтанд. Ба гуфтаи корманди Раёсати маорифи ВМКБ, ҳоло онҳо дар шаҳри Хоруғ барои истиқболи ғолибони озмун омадагӣ мебинанд.

“Раёсати маорифи Вилояти Мухтори Кӯҳистони Бадахшон ин шогирдонро барои пирӯзӣ дар олимпиадаи байнулмилалии “Арифметикаи зеҳнӣ – 2019” самимона таҳният мегӯяд”, - афзуд Назаршоев.

Ёдовар мешавем, ки ин озмун рӯзи 22-юми ноябр дар Гурҷистон бо ташаббуси “Асотсиатсияи ҷаҳонии арифметикаи зеҳнӣ” (GAMA) гузаронида шуд. Дар он хонандагон аз Қирғизистон, Қазоқистон, Ӯзбекистон, Тоҷикистон, Туркманистон ва кишварҳои Аврупо ширкат варзиданд.

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.