Сокини 41-солаи шаҳри Душанбе, ки баъд аз муноқишаи оилавӣ бедарак шуд, даст ба худкушӣ задааст. Ҷасади ӯро 8-уми декабр наҷотбахшони Кумитаи ҳолатҳои фавқулодда аз Кӯли ҷавонон берун оварда, барои ташхису таҳқиқ ба мақомоти дахлдор супориданд.

Тибқи иттилои маркази матбуотии Кумитаи ҳолатҳои фавқулодда, марҳум соҳиби 2 фарзанди ноболиғ ва ду маълумоти олии тиббӣ ва ҳуқуқшиносӣ будааст.

Хабар дода мешавад, ки ҷузъиёти дигари ҳодиса ҳоло рӯшан нест ва мақомоти салоҳиятдор ба тафтишу муайян кардани сабабҳои он пардохтаанд.

Дар робита ба ин ҳодиса торнамои “Ахбор” иттилоъ додааст, ки ҷасади ин мардро бо аломатҳои марги маҷбурӣ аз об берун оварданд. Ба гуфтаи шоҳидон, дар пойҳои мард санг баста, сипас ғарқаш кардаанд. Гӯё ин мард дар прокуратураи ҳарбӣ кор мекард, чанд вақт боз беномунишон шуда буд ва мақомот ҷустуҷӯяш доштанд.

Ба “Азия-Плюс” дар Прокуратураи ҳарбии гарнизони шаҳри Душанбе, Вазорати корҳои дохилии Тоҷикистон, Раёсати ВКД дар шаҳри Душанбе, инчунин Прокуратураи шаҳри Душанбе маълумоти корманди ҳифзи ҳуқуқ будани марди фавтидаро тасдиқ накарданд. 

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.