Саттор Худойбердиев, ҷуғрофишиноси маъруф, доктори илмҳои педагогӣ, профессор, ки дирӯз дар синни 82-солагӣ даргузашта буд, имрӯз, соати 10 дар зодгоҳаш, деҳаи Басмандаи ноҳияи Деваштич ба хок супорида шуд.

Дар маросими видоъ ва дафни ӯ раҳбарммяи ва устодони Донишгоҳи давлатии Хуҷанд, шогирдон ва пайвандону наздикони марҳум иштирок карданд. Дар ин бора ба “Азия плюс”  яке аз наздикони марҳум хабар дод.

“Рӯзи гузашта баъд аз нисфирӯзӣ устод аз  олам даргузаштанд. Солҳои охир дар хона бознишаста буданд ва  бемории “инсулт” доштанд”, - мегӯянд Ихтиёр Худойбердиев, фарзанди Саттор Худойбердиев.

Саттор Худойбердиев дар баробари он ки як донишманди саршиноси ҷуғрофиё дар Тоҷикистон буд, бештар бо иқдомҳои инфиродияш низ маъруф буд. Аз ҷумла ӯ дар се мактаби зодгоҳаш  барои хонандагони шоиста аз пули шахсии худаш стипендия таъсис дода буд.

Маросими ҷанозаи профессор Саттор Худойбердиев дар зодгоҳаш

Марҳум муаллифи 50 китоб,  аз ҷумла "Географияи иқтисодӣ ва иҷтимоии Тоҷикистон", “Географияи Тоҷикистон", "Вилояти Суғд ба 1000 савол ҷавоб", "Оё Шумо шаҳри Хуҷандро медонед?", "Аввалин китоби география дар Тоҷикистон" ва мақолаҳои зиёди илмиву оммавӣ буд.   

Саттор Худойбердиев 30-юми марти соли 1939 дар деҳаи Басмандаи  ноҳияи Деваштич таваллуд шуда, пас аз хатми мактаби миёна, соли 1964 Донишгоҳи давлатии Хуҷанд (он замон Институти давлатии педагогии Ленинобод)-ро хатм карда буд.

Корро аз муаллимӣ дар мактаби миёна оғоз карда, аз соли 1967 дар факултаи табиатшиносию ҷуғрофиёи Донишгоҳи давлатии Хуҷанд  идома додааст.

Соли 1975 коромӯз-тадқиқотчии Институти педагогии шаҳри Санкт-Петербург ба номи Гертсен буд. Баъдан ба ҳайси дотсенти кафедраи ҷуғрофияи иқтисодӣ ва соли 2010 ҳамчун  профессор, мудири кафедраи ҷуғрофияи Донишгоҳи давлатии Хуҷанд кор карда буд. Ҳамчунин дар донишгоҳҳои дигари шаҳри Хуҷанд низ ба сифати профессор ба тадриси донишҷӯён машғул буд. 

Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед. 

Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.