“Тоҷикфилм” тасмим дорад ба ифтихори ҷашни Наврӯз Ҷашнвораи синамоии ҷоизаи миллии “Тоҷи Сомон” баргузор намояд. Дар ин бора Иттифоқи синамогарони Тоҷикистон дар сафҳаи расмияш дар Фейсбук хабар додааст.

Як манбаъ аз “Тоҷикфилм” гуфт, ки қарор аст, ин ҷашнвора дар рӯзҳои ҷашни Наврӯз ҳамзамон бо “Рӯзҳои кинои Ӯзбекистон”, “Рӯзҳои кинои Белорус” ва нишасти Шӯрои раҳбарони киностудияҳои кишварҳои узви ИДМ ва Гурҷистон баргузор шавад.

Ба гуфтаи ин манбаъ, баргузории ҷашнвораи мазкур дар доираи "Барномаи рушди кино барои солҳои 2018-2022" сурат мегирад.

“Мо барои баргузории Ҷашнвораи ҷоизаи миллии “Тоҷи Сомон” ба Ҳукумати кишвар чанде пеш мактуб ирсол намудем, ки посухи онро то ҳол интизорем", - гуфт манбаъ.

Ӯ афзуд, дар сурати ҳамоҳанг нашудани ин иқдом эҳтимол аст он дар моҳи май гузаронида шавад.

Гуфта мешавад, ҷашнвораи ҷоизаи миллии “Тоҷи Сомон” дар 12 бахш сурат гирифта, филмҳои кӯтоҳу баланди ҳунарӣ, мустанад ва тасвириро фаро хоҳад гирифт.

Ин дар ҳолест, ки “Тоҷикфилм” ният дошт, дар соли 2020 Ҷашнвораи якуми байналмилалии “Душанбе”-ро баргузор намояд, аммо ба далели пандемияи “Covid-19” барпо нашуд. 

Дар Telegram, Facebook, Instagram, OK ва ВК бо мо бимонед.

Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.