29 август Эмомалӣ Раҳмон, Президенти Тоҷикистон ба Ориф Алвӣ, Президенти Покистон вобаста ба ҳалокати одамони зиёд бар асари офатҳои табиӣ, барқияи изҳори тасаллӣ ирсол намуд.

Дар барқия аз ҷумла гуфта мешавад, ки “хабари фавти шумораи зиёди одамон дар Ҷумҳурии Исломии Покистон бар асари обхезиҳои харобиовари ахир боиси андӯҳи бепоёни мо гардид”.

Дар робита ба ин, Эмомалӣ Раҳмон ба Ориф Алвӣ, аҳли хонавода, ҳамаи пайвандону наздикони фавтидагон ва мардуми дӯсти Покистон таъзияи амиқ ва тасаллиятҳои сидқии худро иброз намудааст.

Дар охир, Президенти Тоҷикистон аз даргоҳи Худованд барои ҷонбохтагон раҳмату мағфират ва ба ҳамаи осебдидагон шифои оҷил хостааст.

Ёдовар мешавем, ки дар Покистон, аз моҳи июни имсол то 28-уми август дар натиҷаи омадани селу обхезиҳо 1061 кас ҷон бохтанд.

Ҳамчунин, дар пайи офатҳои табиӣ беш аз 33 миллион нафари дигар бе ҷо шуда, тақрибан як миллион хона вайрон гардидааст.

Дар Telegram, Facebook, Instagram, OK ва ВК бо мо бимонед.