Қоҳир Расулзода, сарвазири Тоҷикистон зимни суханронии фосилавии хеш дар ҷаласаи ғайринавбатии Созмони Аҳдномаи Амнияти Дастаҷамъӣ (СААД) аз давлатҳои Озарбойҷону Арманистон даъват намуд, ки ҷангро қатъ карда, роҳи ҳалли дипломатии ихтилофро ҷустуҷӯ намоянд, хабар медиҳад АМИТ “Ховар”.

Бино бар навиштаи ин хабаргузорӣ, сарвазири мамлакат изҳори итминон кардааст, ки ягона роҳи таъмини сулҳу субот дар минтақа - ин истифодаи муассир аз воситаҳои муколама дар асоси санадҳои қабулгардида мебошад.

“Муҳим аст, ки ба ташаннуҷи минбаъдаи вазъият роҳ дода нашавад ва ҷонибҳо ҳарчи зудтар роҳҳои ҳалли мушкилотро ба маҷрои сиёсиву дипломатӣ баргардонанд”, - иброз доштааст Қоҳир Расулзода.

Гуфтан ҷоиз аст, ки шоми дирӯз, 13-уми сентябр бо дархости Никол Пашинян, сарвазири Арманистон ва дар як вақт, раиси феълии Шӯрои амнияти дастҷамъии СААД ҷаласаи ғайринавбатии ин Шӯро дар шакли маҷозӣ баргузор гардид.

Бо супориши Эмомалӣ Раҳмон, дар ҷаласаи мазкур, Сарвазири мамлакат Қоҳир Расулзода иштирок ва суханронӣ намуд.

Ёдовар мешавем, ки шаби 12-ум ба 13-уми сентябр миёни Озарбойҷону Арманистон дар масъалаи Қаробоғи Кӯҳӣ низои мусаллаҳона оғоз шуда, ҳар ду ҷониб ҳамдигарро барои иғвоангезӣ муттаҳам карданд.

Бар асари задухӯрдҳои мусаллаҳона, аз ҳарду ҷониб, ҳудуди 100 нафар кушта шудаву садҳо нафари дигар захм бардоштаанд.

Гуфтан ба маврид аст, ки ихтилофи Озарбойҷон ва Арманистон сари масъалаи Қаробоғи Кӯҳи беш аз 30 сол шуд, ки идома дорад ва сари чанд вақт ба низоҳои мусаллаҳона мепечад.

Дар Telegram, Facebook, Instagram, OK ва ВК бо мо бимонед.