Нерӯҳои марзбонии КДАМ-и Тоҷикистон субҳи имрӯз, 17-сентябр, бо нашри изҳороти навбатӣ гуфт, ба соати 10:00 вазъ дар сарҳади Тоҷикистону Қирғизистон нисбатан муътадил аст, вале нақзи созиши оташбас дар мавридҳои алоҳида аз ҷониби сарбозони қирғиз дида мешавад.

Дар изҳороти ин ниҳод, ки дар АМИТ "Ховар" нашр шуд, гуфта мешавад, ки сарбозони қирғиз аз самти маҳаллаҳои Самарқандак ва Коктоши ноҳияи Боткен ҷониби мавзеъҳои наздимарзии Тоҷикистон аз силоҳҳои гурӯҳӣ тирпарронӣ мекунанд.

- Ҳамзамон бо ин, ҷобаҷокунии қувва ва воситаҳои иловагии ҳарбии Қувваҳои мусаллаҳи Қирғизистон дар хати сарҳад ва мустаҳкамкунии мавқеъҳои ҷангӣ мушоҳида мегардад, ки аз омодагӣ ба амалҳои навбатии иғвоангезонаи низомиёни қирғиз ҷиҳати ноором кардани вазъият шаҳодат медиҳад,- омадааст дар изҳороти Неруҳои марзбонии Тоҷикистон.

Ин ниҳод гуфтааст, ки Тоҷикистон ҷонибдори барқарор намудани амну субот дар марзи ду кишвари ҳамҷавор буда, тамоми талошҳоро барои баргузор намудани гуфтушунидҳо ва ҳал намудани муноқиша бо роҳҳои дипломатӣ равона намудааст.

Дар Telegram, Facebook, Instagram, OK ва ВК бо мо бимонед