«Ин маълумоти нодуруст аст. Аз ҷониби роҳбарияти “IT Park” чунин пешниҳоде нашудааст», - гуфтанд ба “Азия-Плюс“ дар  маркази матбуотии ин ширкат.

Ҳафтаи пеш Файзулло Сафаров, таҳиягари системаи “Dodaho.tj” ба “Азия-Плюс” хабар дода буд, ки “IT Park”- и Ӯзбекистон бо харҷи 10 млн. доллари америкоӣ хостори харидории стартапи системаи ҷустори тоҷикии  “Dodaho.tj” мушобеҳ ба Google ва ё Яндекс шудааст.

Номбурда гуфт, онҳо ба харидорони ӯзбек посухи рад доданд, зеро нафаре, ки худро менеджери “IT Park”- и Ӯзбекистон муаррифӣ кард, мехост баъди харидорӣ “Dodaho.tj” - ро ба “Dodaho.uz” тағйир диҳад ва ин хилофи манфиатҳои миллӣ аст.

Ӯ нафари мушаххасро аз “IT Park”- и Ӯзбекистон ном нагирифт ва танҳо гуфт, як нафар ба ӯ занг зада, худро яке аз менеҷерҳои ин ширкат муаррифӣ кард ва ба ӯ пешниҳод намуд, ки стартапашро бо чунин нарх фурӯшад.

Ҳамчунин, Сафаров розӣ нашуд, рақами телефони “менеджер”- и “IT Park”- и Ӯзбекистонро ба мо пешниҳод кунад ва гуфт, пешниҳодкунанда хостааст, ки номаш ифшо нашавад.

Дар Telegram, Facebook, Instagram, OK ва ВК бо мо бимонед.