Ҳела Шайхруҳӣ, ноиби мудири кулли минтақавӣ дар Шарқи наздик, кишварҳои Осиёи Марказӣ, Туркия, Афғонистон ва Покистон, дар доираи фаъолияти IFC оид ба тақвият бахшидани кӯшишҳои кишвар баҳри ноил шудан ба рушди устувор ва фарогири иқтисодӣ, тавассути афзоиши сармоягузории бахши хусусӣ вориди Тоҷикистон шуд ва дар назар аст, то 9-уми ноябри соли ҷорӣ бо мақомоти баландпояи ҳукумат, шарикони рушд ва намояндагони бахши хусусӣ ҷиҳати тавсеаи фаъолияти IFC дар Тоҷикистон ва ҷалби сармояи иловагӣ ба бахшҳои асосии иқтисод гуфтугӯҳо анҷом медиҳад.

Вохӯриҳо қисме аз талошҳои  IFC барои дастгирии рушди бахши хусусӣ ва кӯмак ба тиҷорат дар ҳалли мушкилоти гуногуни иқтисодӣ, аз ҷумла таъсири пандемияи COVID-19 ва ҷанг дар Украина мебошанд.

"IFC мекӯшад, барномаи ислоҳоти стратегии Ҳукумати Тоҷикистонро барои бунёди иқтисоди бозорӣ, ки ба рушди содирот нигаронида шудаст дастгирӣ намояд ва дар  эҷоди ҷойҳои корию ноил шудан ба пешрафти устувори дарозмуддат саҳм дошта бошад", – кайд намуд Шайхруҳӣ.

Ёдовар мешавем, ки IFC, узви Гурӯҳи Бонки Ҷаҳонӣ, бузургтарин созмони байналмилалии рушд буда, ба бахши хусусии кишварҳои дорои  бозорҳои рӯ ба рушд таваҷҷӯҳ зоҳир мекунад. Ин созмон бо истифода аз сармоя, дониш ва таҷрибаи амалӣ дар зиёда аз 100 кишвари дунё лоиҳаҳоро амалӣ карда, барои фароҳам овардани бозорҳо ва имкониятҳои нав барои кишварҳои рӯ ба тараққӣ заминагузорӣ менамояд.

Дар соли молиявии 2022 IFC барои ширкатҳои хусусӣ ва муассисаҳои молиявии кишварҳои рӯ ба тараққӣ маблағи рекордии 32,8 миллиард доллар ҷудо намудааст, то тавоноии бахши хусусӣ барои хотима додан ба камбизоатии шадидро беҳтар сохта, баҳри бартараф кардани оқибатҳои бӯҳрони бисёрҷанбаи ҷаҳонӣ ва мусоидат дар рушди муштарак, саҳм дошта бошад.

Дар Telegram, Facebook, Instagram, OK ва ВК бо мо бимонед.