Хонаҳои аз заминларзаи моҳи март харобгашта дар ноҳияи Кӯҳистони Мастчоҳ то 1-уми август пурра барқарор карда мешавад. Дар ин бора Кумитаи ҳолатҳои фавқулода ва мудофиаи граждании Тоҷикситон хабар медиҳад.

Ба гуфтаи манбаъ, дар ноҳияи Кӯҳистони Мастчоҳи вилояти Суғд ахиран ҷаласаи Коргурӯҳи ҳолатҳои фавқулода баргузор гардида, зимни он раванди корҳои барқарорсозии хонаҳои зарардида баррасӣ гардидаанд.

Дар ҷаласаи Коргурӯҳи ҳолатҳои фавқулода зикр шудааст, ки дар айни замон корҳои барқарорсозии пайомадҳои заминларзаи рӯзи 23-уми марти соли 2023 идома дорад.

“Маводи ғизоӣ, маводи сохтмон ва ҷуброни пулии ҷудошуда аз ҷониби Ҳукумати Тоҷикистон ба аҳолии зарардида расонда шуд”, - таъкид шудааст дар хабар.

Хайрулло Бобозода, раиси Коргурӯҳи ҳолатҳои фавқулода ва раиси ин ноҳия ба роҳбарони дахлдор супориш додааст, ки суръати корҳои сохтмон ва таъмири биноҳои зарардида дар заминларза тезонида шуда, то 1 августи соли 2023 ҳамаи ин корҳо пурра ба анҷом расонда шаванд.

Ёдовар мешавем, ки дар натиҷаи заминларзаи 23-уми марти соли равон дар ҷамоати деҳоти Лангари ноҳияи Кӯҳистони Мастчоҳ 219 хонаи истиқоматии сокинон зарар дида, аз ин 4 хона пурра ва 53 хона қисман хароб шуда буд.

Инчунин, заминларзаи рӯзи 23-уми марти соли равон ба хонаҳои истиқоматӣ дар ҷамоати Такоба ва Оби Меҳнати ноҳияи Рашт низ зарар расонид. Коргурӯҳи ноҳиявии ҳолатҳои фавқулода маълум кард, ки дар ин ноҳия 53 хонаи истиқоматӣ зарар дида, аз ин 31 хона қисман хароб шуд.

Дар Telegram, Facebook, Instagram, OK ва ВК бо мо бимонед.