Дар Тоҷикистон зиёда аз 200 ҳазор кӯдаку наврас дар таътили тобистонаи имсола ба истироҳатгоҳ ё “лагер”-ҳои тобистона мераванд, ки ин нисбат ба соли гузашта 56 ҳазору 747 нафар камтар мебошад. Дар ин бора аз Вазорати маориф ва илми кишвар ба “Азия-Плюс” хабар доданд. 

Манбаъ гуфт, соли ҷорӣ барои ташкили истироҳати тобистонаи кӯдакону наврасон 4,5 млн сомонӣ ҷудо гардидааст. Барои истироҳати кӯдакон соли гузашта 3,8 млн сомонӣ ва соли 2022-юм 3,6 млн сомонӣ ҷудо шуда буд.

“Маблағҳои мазкур дар мадди аввал ба кӯдакони ятиму бепарастор, кӯдакони аз оилаҳои камбизоат ва хонандагони фаъолу боистеъдод пешбинӣ карда шудаанд”,-гуфтанд аз Вазорати маориф ва илм.

Дар вилояти Суғд 30 ҳазору 450 хонанда ва дар вилояти Хатлон 191 ҳазору 290 хонанда ба истироҳатгоҳҳои тобистона мераванд. Инчунин, аз шаҳри Душанбе 3792  хонанда ба истироҳатгоҳҳои беруназшаҳрӣ мераванд.

Дар маҷмуъ, дар ҳудуди ҷумҳурӣ 57 истироҳатгоҳи беруназшаҳрӣ ба қайд гирифта шудаанд, ки аз ин теъдод 20 адади он дар тобеияти шуъбаҳои маориф ва 5 адад дар тобеияти Иттифоқи касабаи кормандони соҳаи маориф ва илм мебошанд.

Хотиррасон мекунем, ки соли 2023 дар 3318 истироҳатгоҳ 256 ҳазору 747 кӯдаку наврас ба истироҳат ҷалб шуда буданд.

Дар Telegram, Facebook ва Instagram бо мо бимонед.