Имсол, сарфи назар аз он ки 1-уми сентябр рӯзи якшанбе аст, соли нави таҳсил дар вақташ – 1-уми сентябр оғоз мешавад.

Дар ин бора аз Вазорати маориф ва илми кишвар ба “Азия-Плюс” хабар доданд.

Ба иттилои ин ниҳод, имсол 1-уми сентябр “Дарси сулҳ” бо иштироки Эмомалӣ Раҳмон, раиси ҷумҳури кишвар дар яке аз макотиби пойтахт баргузор мегардад.

“Аммо мушаххас кадом мактаб, маълум нест, зеро  ифтитоҳи чанд мактаб дар назар аст”, - гуфт манбаи “Азия-Плюс”.

Бояд гуфт, соли гузашта Эмомалӣ Раҳмон “Дарси сулҳ”-ро дар Донишгоҳи давлатии тиббии Хатлон дар Данғара гузаронида, бинои нави ин донишгоҳро расман ифтитоҳ карда буд.

Гуфтан бамаврид аст, ки ҳамасола Рӯзи дониш - 1-уми сентябр дар Тоҷикистон бо “Дарси сулҳ” оғоз меёбад. Дар ин дарс устодону шогирдон суханронии раиси ҷумҳур Эмомалӣ Раҳмонро гӯш мекунанд.

Ба иттилоъи Агентии омори кишвар имсол дар 260 ҳазор хонандаи синфи якум ба мактаб мераванд. Аз ин миён 125 ҳазорашро духтарон ва 135 ҳазори дигарро писарон ташкил медиҳанд.

Тибқи иттилоъи Вазорати маорифи кишвар, имсол кӯдаконе, ки то 31-уми декабри соли 2017 таваллуд шудаанд, ба синфи якум қабул мешаванд.

Дар Telegram, Facebook, Instagram, OK ва ВК бо мо бимонед.