Бо оғози соли нави хониш донишҷӯён аз қимат шудани нархи иҷораи хона дар шаҳри Душанбе шикоят мекунанд. Афзоиши нарх пас аз омадани шумори зиёди шаҳрвандони Русия дар соли 2022 шуруъ гардид, ки пас аз эълони сафарбарии ҳарбӣ дар ин кишвар ба кишварҳои Осиёи Марказӣ рӯй оварданд.

“Азия-Плюс” нархи иҷораи хонаи 1, 2 ва 3-ҳуҷрагӣ дар Душанбе, Тошканд, Бишкек, Остона ва Ишқободро бо нархи баланд, миёна ва паст муайян кард.

Барои ин, мо 50 эълони хонаҳои 1, 2 ва 3 ҳуҷрагӣ дар ин шаҳрҳоро, ки дар сомонаҳои пахши эълонҳо дар моҳҳои август ва сентябр нашр гардидаанд, таҳлил кардем.

Дар шаҳри Душанбе нархи иҷораи хонаи 1-ҳуҷрагӣ вобаста аз масоҳат ва шароити зарурӣ дар як моҳ ба ҳисоби миёна аз 160 то 360 доллар мебошад. Инчунин қимати хонаи 2-ҳуҷрагӣ ва 3-ҳуҷрагӣ ба ҳисоби миёна аз 500 то 700 доллар мебошад.

Дар байни пойтахтҳои кишварҳои Осиёи Марказӣ дар Ишқобод нархи иҷораи хона нисбатан арзонтар аст. Дар ин шаҳр бо ҳисоби миёна бо 240 доллар хонаи 1-ҳуҷрагӣ бо масоҳати 40 метри мураббаъ ва муҷаҳҳаз бо лавозимоти заруриро ба иҷора гирифтан мумкин аст. Ҳамчунин дар ин шаҳр ба ҳисоби миёна иҷораи хонаи 2-ҳуҷрагӣ 320 доллар ва 3-ҳуҷрагӣ 410 доллар мебошад.

Нархи баландтарин дар Остона ва Бишкек мебошад, ки ба ҳисоби миёна барои иҷораи манзили 1-ҳуҷрагӣ аз 440 то 520 доллар, 2-ҳуҷрагӣ аз 670 то 1520 доллар ва 3-ҳуҷрагӣ 1140 то 2130 доллар лозим аст.

Яке аз ноҳияҳои шаҳри Бишкек
tazabek.kg

Дар Тошканд низ нархи иҷораи хона тақрибан ба нархгузории шаҳри Бишкек наздик аст. Дар ин шаҳр ба ҳисоби миёна арзиши иҷораи хонаи 1-ҳуҷрагӣ 420 доллар, 2-ҳуҷрагӣ 700 доллар ва 3-ҳуҷрагӣ 1000 доллар вобаста аз масоҳат ва шароит муайян шудааст.

Маълумоти бештар оиди нархи иҷораи манзили истиқоматӣ дар пойтахтҳои кишварҳои Осиёи Марказиро метавонед дар тасвир (карточка)-и зерин бинед:

1/6

Бояд гуфт, ки натиҷаи арзишҳои муайянкардаи мо бо таварруми доллару қурби асъори миллии кишварҳои Осиёи Марказӣ бароварда шудааст.

Таҳлили вазъ нишон дод, ки сабаби баланд шудани нархи иҷора дар пойтахтҳои кишварҳои Осиёи Марказӣ, пеш аз ҳама талаботи аҳолӣ ва меҳмонон ба хона ва оғози соли таҳсил аст, ки донишҷӯён аз минтақаҳо бармегарданд ва мехоҳанд, ки барои зист хона ба иҷора гиранд.

Дар Telegram, Facebook ва Instagram бо мо бимонед.