Субҳи имрӯз, 5-уми декабр Эмомалӣ Раҳмон, раисиҷумҳури кишвар бинои нави Додгоҳи олии Тоҷикистонро ифтитоҳ ва бо додрасҳои тоҷик мулоқот кард. Дар ин бора Хадамоти матбуотии перзиденти Тоҷикистон хабар медиҳад.

Ба гуфтаи манбаъ, мулоқоти сарвари давлат бо додрасҳо дар бинаи нави Додгоҳи олӣ, ки дар кӯчаи Шевченкои ноҳияи Исмоили Сомонии шаҳри Душанбе ҷойгир аст, баргузор шуд.

Ҷузъиёти дигари ин мулоқот то ҳол маълум нест. Дирӯз як манбаъ аз ҳукумати ҷумҳурӣ ба “Азия-Плюс” гуфта буд, ки Эмомалӣ Раҳмон бурду бохти низоми додрасиро дар ин мулоқот ба баррасӣ мекашад.

Бинои Суди Олӣ аз 15 ошёна иборат буда, сохтмони он аз ҷониби Дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон бо харҷи қариб 185 миллион сомонӣ аз ҳисоби маблағҳои буҷетӣ бо сифати баланд ва бо риояи меъёрҳои сохтмонӣ анҷом дода шудааст.

Ба  Эмомалӣ Раҳмон иттилоъ доданд, ки бинои нави Суди Олӣ дорои 171 ҳуҷраи корӣ, маҷлисгоҳ бо 400 ҷойи нишаст, 8 толори муҳокимаи судӣ, бойгонии парвандаҳои судӣ, ҳуҷраҳои қабули шаҳрвандон, ҷойи нигоҳдории судшавандаҳо, толор барои конфронсҳои матбуотӣ, китобхонаи анъанавӣ ва электронӣ, ошхона ва дигар иншооти ёрирасон буда, ҳамаи ҳуҷраҳо тибқи стандартҳои матлуб ҷиҳозонида шудааст.

1/5

Дар таҳхонаи бино таваққуфгоҳ барои 25 воситаи нақлиёт мавҷуд аст.

Ёдовар мешавем, ки бори охир 5 соли пеш, 21 ноябри соли 2019 Эмомалӣ Раҳмон бо кормандони мақомоти додгоҳӣ мулоқот карда буд.

Дар Тоҷикистон беш аз 400 додрас амал мекунад, ки онҳо бо фармони президент таъин ва озод мешаванд.

Шикоятҳо дар бораи фаъолияти додрасҳо ҳам дар ҷомеа кам нест ва бархе аз фаъолияти нодурусти онҳо шикоят мекунанд.

Ҳатто Эмомалӣ Раҳмон дар мулоқоти худ бо кормандони мақомоти судӣ дар соли 2019 аз фаъолияти додрасҳои тоҷик интиқод карда буд.

Ӯ гуфта буд, ки “амали коррупсионӣ на танҳо обрӯ ва нуфузи мақомоти судиро паст мекунад, балки эътимоди мардум ва эътибору эҳтироми давлатро коста мегардонад”.

Дар Telegram, Facebook ва Instagram бо мо бимонед.