Дорои Дӯст, донишманди тоҷик ва яке аз рӯзноманигорони шинохтаи замони шӯравӣ бар асари беморие, ки дошт, дар Душанбе аз олам даргузашт. Ҷанозаи ӯ субҳи имрӯз, 18 декабр дар масҷиди “Аминҷон”-и маҳаллаи 61-уми пойтахт хонда шуд ва марҳумро дар оромгоҳи Сариосиё ба хок супориданд.

Ӯ дар оилаи тоҷикони муқими Ӯзбекистон ба дунё омада буд. 

Баъди хатми Донишкадаи омӯзгории Душанбе дар соли 1963 дар рӯзномаи “Маориф ва маданият” ба кор оғоз кард ва беш аз 40 сол дар ин нашрия фаъолият намуд.

Ӯ бо сармуҳаррири вақти ин нашрия Бӯриннисо Бердиева дар эҳё кардани ҷашни наврӯз нақши бориз гузошт ва даҳҳо мақолаҳои илмӣ-оммавӣ дар ин бора ба чоп расонид.

Дорои Дӯст ҳамвора дар канори аҳли зиё буд ва яке аз фаъолони ҷомеаи шаҳрвандӣ ҳам дониста мешуд.

Академик Акбар Турсон дар васфи ӯ гуфта буд: "Дар фарҳанги имрӯзаи тоҷик Дорои Дӯст мақоми Сӯқротро дорад!".

Профессор Абдунабӣ Сатторзода бошад,  бо таъкид ба марди пуркор будани ӯ дар ҳаққи ӯ гуфтааст, ки "агар Дорои Дӯст нависандагӣ, шоирӣ, тарҷумонӣ, олимӣ, ва ё дар ниҳоят устодиро пеша мекард, дар ҷумлаи беҳтарини беҳтаринҳо мебуд".

Профессор Сафар Абдуллоҳ ҳам имрӯз дар паёме Дорои Дӯстро шахсе номид, ки "ба даҳҳо нафар дарси хештаншиносӣ дода буд".

"Дареғу сад дареғ, ки меҳани мо боз як фарзанди фарзонаашро аз даст дод, боз як хуршед моро тарк гуфт," -- навишт Сафар Абдуллоҳ.

Дар Telegram, Facebook ва Instagram бо мо бимонед.