Соли гузашта дар ноҳияи Мастчоҳ, ки аз навоҳии пахтакори вилояти Суғд аст, нақшаи ҷамъоварии пахта ҳамагӣ 60% иҷро шудааст. Ба ҷои 28,4 ҳазор тонна пахта ҳамагӣ 17 ҳазор тонна "тиллои сафед" ба хирман супорида шудааст.

Аъзам Ализода, раиси ноҳияи Мастчоҳ рӯзи 28-уми январ зимни нишасти матбуотӣ номусоидии иқлим ва тухмии пастсифатро сабаби аслии кам шудани ҳосил ва талаф ёфтани пахта унвон кард.

“Дар ноҳияи Мастчоҳ  ҳаво якбора 43-44 дараҷа гарм шуд, ки деҳқонон 20-30% ҳосилро аз даст доданд. Ҳатто дар баъзе хоҷагиҳо пахта як-ду ваҷаб қад кашиду боз хушкид. Баъди дархоси мо аз тарафи  як шӯъбаи Кумитаи бехатарии озуқаворӣ  ташхис карданд ва маълум шуд, ки беш аз 40%-и тухмиҳое, ки дар ноҳияи Мастчоҳ мавҷуд аст тухмиҳои  техникӣ будааст”-шарҳ дод раиси ноҳия.

Ба гуфтаи Ализода баъзе соҳибкорон 4-5 намуди тухмиҳои пастсифатро омехта карда, ба бозор баровардаанд, ки дар натиҷа, деҳқонон зарар диданд.

Аъзам Ализода
Акс аз sugdnews.com

Вай афзуд, ки айни замон гурӯҳи корӣ аз ҳукумати кишвар ва Кумитаи бехатарии озуқаворӣ дар заводу корхонаҳои ноҳияи Мастчоҳ рафта, сатҳу сифати тухмиҳоро месанҷанд.

Раиси ноҳия гуфт, ки масъулини ҳукумати Мастчоҳ азм доранд, аз мавсими нав тухмиҳое, ки сертификат надорад, кишти онро манъ кунанд.

Ёдовар мешавем, ки дар ноҳияи Мастчоҳ соли 2024 дар ҳамаи шаклҳои хоҷагидорӣ дар майдони 26 ҳазору 993 гектар гектар кишти зироатҳои кишоварзӣ анҷом дода шуд, ки нисбат соли 2023-юм 496 гектар зиёд аст. Кишти пахта дар майдони 12084 гектар гузаронида шудааст.

Дар умум дар ноҳия беш аз 60 ҳазор хоҷагиҳои деҳқонӣ мавҷуд аст, ки тибқи дурнамо 65% пахтакор ва 35% дигар намуди маҳсулоти кишоварию полезӣ парвариш мекунанд.

Дар Telegram, Facebook ва Instagram бо мо бимонед.